plagosur lehtë, edhe ai nga ciflat e xhamit që janë thyer nga plumbat e automatikut. Policia ka shpallur në kërkim protagonistin e kësaj ngjarjeje. Sikurse mësohet nga burime pranë Drejtorisë së Policisë së Shkodrës, pasditen e së mërkurës, në një nga lokalet e fshatit Barbullush të komunës Bushat, një nga klientët e lokalit, 32-vjeçari Shpëtim Gërmaj, është grindur në pije e sipër me disa klientë të tjerë. Gjatë grindjes ai ka nxjerrë një thikë, të cilën e kishte me vete dhe me të ka filluar të kërcënojë personat me të cilët ishte konfliktuar. Në ato momente ka ndërhyrë pronari i lokalit, i cili e ka nxjerrë përjashta të riun. Ky i fundit nuk e ka lënë punën me kaq, por ka shkuar në banesën e tij, ka marrë një armë zjarri automatike dhe është kthyer përsëri duke gjuajtur nga jashtë me armën e zjarrit në drejtim të lokalit. Brenda në lokal në atë moment kanë qenë rreth 10 persona. Klientët e lokalit, sapo kanë dëgjuar të shtënat e armës, janë shtrirë menjëherë përtokë për t’iu shpëtuar plumbave. Fatmirësisht nga kjo ngjarje nuk ka pasur të lënduar rëndë. I vetmi person që ka marrë lëndime të lehta ka qenë 26-vjeçari Frederik Bardhi, i cili u godit nga copat e xhamave. Pas marrjes së mjekimit në spitalin e qytetit ai i ka lënë ambientet e tij. Ndërsa autori Shpëtim Gërmaj është larguar në drejtim të paditur së bashku me armën e zjarrit, pa u ndalur nga policia. Tashmë Policia e Shkodrës e ka shpallur Gërmajn person në kërkim, pasi ndaj tij janë ngritur akuzat për veprat penale të “vrasjes së kryer në rrethana cilësuara, ndaj dy ose më shumë personave, e ngelur në tentativë”, si dhe “mbajtje pa leje të armëve të zjarrit”.