Fillimisht u dëmtua mekanizmi i hapjes së urës së re të Bunës duke përvetësuar rreth 50 metra linear kabllo elektrik dhe duke sjellë dëme të mëdha në funksionimin e pajisjeve komanduese të ndriçimit të urës, por edhe të mekanizmit hapës të saj. Por ajo po vazhdon të dëmtohet.
Në muajin Shkurt Shqiptarja.com denoncoi dëmtimin e Urës së re të Bunës. Kablloja që mundësonte hapjen dhe mbylljen e kësaj ure, në rast të kalimit ndonjë anijeje, u vodh me qëllim shitjen për skrap, në shkurt nga persona ende të paidentifikuar.
Drejtori i Autoritetit Verior të Rrugëve Nesti Kiri atëhertë shprehu shqetësimin lidhur me vjedhjen e kabllit që garantonte lëvizjen e sistemit elektromagnetik në urën e re të Bunës në qytetin e Shkodrës.
Por ky nuk është rasti i parë kur investimet në projekte publike dëmtohen qëllimisht për tu shitur më pas për skrap në qytetin e Shkodres. Përballë këtij fakti bashkia e Shkodrës ka kërkuar bashkëpunimin më qytetarët në denoncimin e këtyre rasteve.
Burime zyrtare nga Bashkia Shkodër bëjnë të ditur për ATSH-në se, shumë shpejt ura e re e Bunës do të merret në mbrojtje nga policia e rendit. Ura është me gjatësi 275.5 metra, gjerësi 13.5 m, me dy korsi lëvizjeje për automjete, si dhe dy trotuare anësore më gjerësi 2 metra secili.